شقة جوزي التاني والاخيرة
الجزء الثاني والأخير:
خرجت من الشقة وكنت رايحة للبيت القديم، بس قبل ما أدخله، روحت للمحامي اللي كان صديق عمري لأبوه الله يرحمه. قولتله: “يا أستاذ رفعت، الشقة اللي إحنا قاعدين فيها دي مكتوبة باسم مين؟”. قالي: “باسمك يا أم الحج، جوزك الله يرحمه كتبهالك بيع وشراء من زمان عشان يأمنك”. قولتله: “تمام.. أنا عايزة أعمل قرار تمكين وأطرد أحمد ومراته منها، وعايزاك ترفع القض*ية دي فوراً”. المحامي اتقدم وجالي ذهول، بس لما حكيتله اللي أحمد قاله وإنه رماني في البيت الخربان وقالي “رجلك والقبر”، المحامي عينه دمعت وقالي: “من بكره هبدأ في الإجراءات، وده حقك القانوني والشرعي”.
روحت قعدت في البيت القديم واستحملت البرد والتراب كام يوم، وكنت بسمع إنهم عاملين سبوع وهيصة في الشقة وفرحانين بأوضة البيبي الجديدة وبيتمنظروا قدام أهل مراته.
بعد أقل من أسبوع، الإجراءات القانونية خلصت بسرعة لأن الشقة ملكي بالكامل وعقد البيع موثق. وفوجئ أحمد وهو قاعد مع مراته وأهلها بالشرطة والمحضرين بيخبطوا على الباب ومعاهم قرار طرده وتسلّمي الشقة.
أحمد اتصدم ومراته بدأت تصرخ، وكلمني في التليفون وهو بيعيط ويزعق: “أنتي بتطرديني يا أمي؟ بتفضحيني قدام نسايبي وتطردي ابنك وحفيدك في الشارع؟”.
رديت عليه بكل قوة وقسوة عمري ما تخيلت إنها تطلع مني: “مش أنتوا اللي قولتوا البيت القديم حلو وزي الفل ومفهوش حاجة وأني بكبر المواضيع؟ أهو البيت القديم فاضي ومستنيكم.. روح اقعد فيه أنت ومراتك وابنك ووريني مستقبلك ومستقبل ابنك اللي كنت خايفة عليه هتعمله إزاي هناك!”.
حاول يترجاني ويبكي ويقولي: “سامحيني يا أمي، مراتي هي اللي وزتني وشحنتني ضدك”، قولتله: “اللي يبيع أمه عشان مراته ونسايبه يستاهل يترمي في الشارع، وأنا دلوقتي راجعة شقتي، شقة جوزي اللي شقي وتعب عشانها، ومش هسيبك تاخد منها قشاية واحدة.. والبيت القديم أهو سيبتهولك وريني هتعيش فيه إزاي!”.
